Innovación destinará en 2008 máis de 42 millóns ás universidades galegas

O conselleiro de Innovación e Industria, Fernando Blanco, vén de anunciar hoxe, venres 28 de decembro, que o seu departamento vai achegar 42,4 millóns de euros ao financiamento das universidades galegas, o que representa un crecemento do 26 por cento en relación ao exercicio do pasado ano. Blanco fixo este anuncio no acto de sinatura de varios convenios de colaboración coas tres universidades galegas celebrado esta mesma mañá en Santiago de Compostela.
O obxectivo da devandita Consellaría é traballar coas universidades para dotar a Galiza dos equipamentos científicos e tecnolóxicos que permitan acadar melloras cualitativas na investigación, no desenvolvemento e na innovación do noso país a medio prazo.
Neste senso, Blanco asegurou que a I+D+i “vaise dinamizar con infraestruturas como o Centro Tecnolóxico do Sector Lácteo no campus de Lugo, as novas instalacións do Centro de Supercomputación de Galiza en Santiago, o Centro do Naval e do Plástico no campus de Ferrol ou a construción do Centro de Investigacións Biomédicas en colaboración coa Universidade de Vigo”.
Nos vindeiros meses, a Consellaría de Innovación e Industria vai mobilizar, neste senso, máis de 100 millóns para infraestuturas e apoio á I+D+i nas universidades dos cales preto de 8 millóns xa se achegan a través dos devanditos convenios de colaboración asinados hoxe.
Estes convenios establecen as condicións de colaboración para o cofinanciamento das actuacións de formación de investigadores e de persoal de apoio á investigación desenvolvidas polas universidades ao longo do ano 2007.