Apple presentará o SDK para o iPhone e iPod Touch o 6 de marzo

Apple convocou a diversos medios para o vindeiro 6 de marzo, día no que se supón que anunciará o Software Development Kit (SDK) para o iPhone, i.e., o paquete de ferramentas que permita a programadores alleos a Apple o desenvolvemento de aplicacións para o iPhone, o que suporá un importante pulo para o dispositivo, que ata o momento só contaba de xeito oficial con aplicacións baseadas en web, mentres que para a creación de aplicacións nativas había que empregar métodos non autorizados que precisaban da liberación dos terminais para o seu uso.
O lanzamento do SDK permitirá a emerxencia de multitude de aplicacións e, presumiblemente, de xogos, que se agarda que se poidan adquirir a través de iTunes.
Hai moitas aplicacións esperadas polos usuarios, coma unha solución de correo push (como a que teñen os terminais Blackberry) e outras ferramentas de uso corporativo, das que se podería dar un adianto o día do lanzamento do agardado SDK.