Adobe estrea un Photoshop en liña para facilitar a publicación de imaxes na web

O pasado mes de setembro Adobe anunciou que estaba a preparar unha versión en liña do seu popular Photoshop, e dende hoxe é unha realidade, de xeito que os usuarios interesados xa poden darse de alta no servizo Photoshop Express, que vén a ser unha aplicación en Flash 9 que permite facer sinxelos axustes en imaxes (recortar, eliminar o efecto de ollos vermellos, cambiar a saturación, suavizar, distorsionar…) pero que non chega a supor unha auténtica alternativa á aplicación de escritorio.
O novo servizo permite almacenar ata 2 Gb de imaxes de balde, e permite a sincronización con Facebook, MySpace e Picasa (o soporte de Flickr chegará nas vindeiras semanas). A súa principal vantaxe é que funciona en calquera navegador para Windows, Mac OS X ou Linux que soporte Flash 9.
O sistema de edición das imaxes non é destructivo, de xeito que os cambios nas nosas fotografías se poden desfacer (podendo rescatar sempre o ficheiro orixinal) e permite agrupar as imaxes en álbums e presentacións. Convértese así nunha alternativa máis para achegar as nosas imaxes á Internet dun xeito doado.
Na mesma liña, Adobe tamén conta co Adobe Premiere Express, que permite a edición de vídeo en liña, e que se ofrece a través de servizos doutras empresas como a MTV e Photobucket.