Polémica ao redor dunha web que vendía ordenadores PC compatibles con Mac OS X

En moitas webs se está a falar hoxe de Psystar, unha empresa que dende a súa web vende un equipo personalizable coñecido coma OpenMac, que vén a ser un PC configurado de xeito que sexa totalmente compatible coa última versión de Mac OS X (grazas a un emulador de EFI), e que permitiría dar así unhas prestacións propias dun Mac Pro ao prezo dun Mac mini, ou sexa, que polo prezo dun dos equipos de baixa gama de Apple se pode conseguir un rendemento máis que notable.
O OpenMac sería un ordenador en formato torre, cun procesador Intel Core 2 Duo a 2,2 GHz, 2 Gb de memoria RAM, tarxeta gráfica Intel GMA 950, DVD e disco duro de 250 Gb, que se pode ampliar en memoria, disco e mesmo incorporándolle unha tarxeta gráfica GeForce 8600GT ou portos Firewire, estando o seu prezo base en 399 dólares mentres que o equipo máis barato de Apple custa 579 euros.
Está claro que os equipos que promete Psystar non son Mac, senón o que a xente dá en chamar Hackintosh, polo que poderían non estar soportados por actualizacións do software de Apple, pero supoñen unha opción moi atractiva para consumidores que gusten do Mac OS X pero non queiran gastar moitos cartos no seu equipo informático. Os OpenMac tampouco teñen o atractivo estético de Apple, e resulta evidente que a instalación de Mac OS X nos mesmos viola a licenza de uso do sistema operativo da empresa de Cupertino. Precisamente isto último podería ter levado a que Apple emprendese medidas legais contra Psystar, pois a web deste fabricante está desaparecida (aínda que podería ser por motivos técnicos, xa que está a acaparar moita atención, o que se traduce nunha enorme carga do seu servidor web).
Estea á venda ou non o OpenMac, queda claro que o rebumbio xerado suporá un pulo para o osx86project (que leva anos traballando na instalación de Mac OS X en PC) e podería levar a moitos usuarios a empregar un PC para introducirse no mundo do Mac, saltando o principal atranco para tal: o elevado prezo dos equipos de Apple.
ACTUALIZACIÓN: A web de Psystar xa está en liña, polo que se confirma que a súa desaparición foi por motivos técnicos.