Swatch deixa de comercializar reloxos con acceso ao servizo MSN Direct

En 2004 Swatch lanzou unha familia de reloxos que recibían por radio distintas informacións do servizo MSN Direct, pero esta tecnoloxía coñecida coma SPOT parece destinada a pasar á historia, e agora anuncian que deixarán de vender este tipo de reloxos, aínda que continuarán a dar soporte e servizo aos usuarios actuais.
Este tipo de reloxos foran unha importante aposta de Microsoft, que comezara polo Swatch Paparazzi (presentado nunha festa na que actuara Sting) e que chegou a contar con dispositivos de alta gama de ata 800 dólares, aínda que os últimos modelos xa tiñan uns prezos aceptables (en 2006 xa se vendían a 179 dólares cunha subscrición de 12 meses a MSN Direct, o que en condicións normais custaría 39 dólares/ano).
Agora o servizo MSN Direct xa non está orientado a reloxos, e apunta máis a navegadores GPS e terminais con Windows Mobile, polo que dirán adeus ao concepto dos reloxos intelixentes.