Adobe renova as versións domésticas de Photoshop e Premiere

Adobe deu a coñecer detalles sobre o Photoshop Elements 7 e o Premiere Elements 7 que achegan respectivamente a edición de fotografías e vídeo ao público en xeral, e que sairán á venda en outubro xunto coa subscrición de 1 ano á web Photoshop.com (onde se conta con 20 Gb de almacenamento).
O Photoshop Elements 7 incorpora novas ferramentas nesta revisión, para favorecer unha edición fotográfica rápida e doada, coma o Quick Fix (que soluciona problemas comúns en fotografías) ou os Smart Burshes (que fan múltiples axustes nun único paso).

O Premiere Elements 7 pola súa banda incorpora coma principal novidade o soporte do formato AVCHD (empregado por moitas das cámaras de vídeo actuais, e que aínda está a ser ignorado por moitas aplicacións informáticas) e tamén conta coa opción de InstantMovie, que vén a ser unha especie de asistente baseado en modelos prefabricados, dando un resultado case profesional ás creacións domésticas.
Este pequeno Premiere tamén inclúe opcións de croma con Videomerge e permite exportar as creacións a distintos soportes coma Blu-ray, DVD, teléfonos móbiles ou YouTube.