A Fecyt organiza en Madrid o I Curso de Monitores de Museos de ciencia e tecnoloxía

A Fundación Española para a Ciencia e a Tecnoloxía (FECYT) vén de anunciar a celebración do I Curso de Monitores de Museos de ciencia e tecnoloxía, que terá lugar en Madrid do vindeiro 1 ao 4 de decembro.
A iniciativa vén promovida por este organismo no marco da Rede de museos de ciencia e tecnoloxía e ten como principal obxectivo a posta en práctica das ferramentas axeitadas “para que sexan os alumnos asistentes (mayoritariamente monitores e responsables de actividades educativas en distintos centros) sexan máis preactivos e poidan exercer como intermediarios entre o público e a institución que representan e entre a ciencia e a sociedade”.
Ao longo de catro xornadas de traballo, unha trintena de monitores de 18 museos e outros centros vinculados á Rede de Museos, realizarán obradoiros prácticos sobre técnicas axeitadas para coñecer o público, atraer a súa atención e estimular as discusións; preparar materiais e contidos para as actividades do centro onde desenvolverán o seu labor; autoavaliar a súa actividade e transformar a propia experiencia nun valor que permita reorientar as actividades dos museos.
Os obradoiros están dirixidos por profesionais de departamentos educativos de distintos museos, centros de ciencia e centros de arte. A participación dos alumnos será primordial e dará a todos a oportunidade de coñecer monitores de toda España para intercambiar experiencias. A rede de museos de ciencia e tecnoloxía, creada en 2007 durante o Ano da ciencia, está integrada por 25 museos y planetarios españoles e ten como obxectivo coordinar e optimizar os recursos e esforzos de tódolos seus membros, así como promover proxectos conxuntos.