O Internet Explorer 8 xa conta cunha versión de proba case final

Os usuarios curiosos que gusten de probar as versións de proba dos programas informáticos, poden xa achegarse á Release Candidate 1 do Internet Explorer 8, que é unha versión case final do navegador de Microsoft que xa presenta unha plataforma plenamente rematada, con melloras de seguridade (coma o sistema InPrivate) e que debería servir para estudar o seu rendemento e compatibilidade.
Esta nova versión do Internet Explorer 8 está dispoñible en multitude de linguas e tanto para Windows XP como para Vista (entendemos que ao Windows 7 Beta chegará a través dunha actualización do sistema operativo), e corrixe moitos dos problemas detectados en anteriores versións de proba, polo que o seu uso parece carente de risco.
Entre as novidades deste Internet Explorer estaría a posibilidade de re-abrir de xeito doado as fichas pechadas accidentalmente (sen ter que consultar o historial), o mencionado modo InPrivate (alcumado como modo porno) e os WebSlices, que nos permite estar ao tanto dun contido concreto dunha páxina web (como a información meteorolóxica ou o a cotización bolsista dunhas accións publicadas nunha web económica).
O Internet Explorer 8 pretende reforzar a presenza do navegador de Microsoft, que aínda que segue a ser maioritario, está a ver cómo cada día hai máis xente pasando a Firefox e mesmo a Google Chrome, aínda que parece que chega con pequenas melloras para reter aos fieis usuarios do navegador incluído de serie en Windows.