UXT habilita unha web para resolver conflitos nas escolas

Se a Internet serve entre outras cousas para que as persoas que sofren abusos dean conta da súa experiencia e sinalen co dedo aos seus responsables, unha boa parte das dúbidas que poidamos ter sobre a comenencia dos cambios que está á desencadear a Rede na sociedade semellan en gran medida esvaecerse: igual que chegaron. A Internet como obxecto de denuncia, comunicación e entendemento (se é posible) é a Rede que quere precisamente impulsar a Federación de Ensinanza da UXT (FETE-UXT), que vén de anunciar a posta en marcha dunha asesoría psicopedagóxica na Internet co fin de incidir a prol da convivencia escolar e na resolución de conflitos.
Esta ferramenta, moi indicada para un deses males que semella dos nosos días pero que houbo sempre (o abuso, de alumnos a alumnos e de mestres a alumnos, e de alumnos a mestres), comezará a estar operativa hoxe mesmo, venres 30 de xaneiro, coincidindo coa celebración do Día Escolar da Non Violencia e da Paz e máis polo miúdo co día en que foi asasinado o líder pacifista hindú Mahatma Ghandi.
A páxina web Convivenciaescolar.org fica deste xeito aberta á participación activa de todas e todos os membros da comunidade ligada á ensinanza, psicólogos, especialistas en educación, pais, mestres e alumnado incluídos. O gran fin da páxina é colaborar na medida do posible na resolución de problemas derivados do acaso ou maltrato, tamén coñecido hoxe en día como bullying.