Time achegará revistas adaptadas aos intereses de cada lector

Time vén de poñer en marcha un proxecto para poñer nas nosas mans o que ben podería considerarse a aplicación das novas vagas e tendencias da Internet (Web 2.0, códigos abertos e programas personalizables, etc) ao modelo habitual dunha revista. O proceso está a coller pulo grazas á un proxecto con nome propio: Mine. Posible grazas ao apoio de Toyota (que anda á procura de novos xeitos de pórse perante o ollo do consumidor e que neste caso terá o privilexio da publicidade exclusiva), a iniciativa conta xa cunha páxina web dende que a poderemos –entre outras moitas cousas- configurar unha revista propia e persoal.
Esta é a raizame da proposta: a web e os seus recursos como apoio para renovar algo que está ferido de morte: a prensa tradicional. Segundo informa Baquia, o lector pode elixir nesta páxina cinco de oito publicacións (Travel and Leisure, Golf, InStyle, Money, Real Simple, Sports Ilustrated, Time e Food & Wine) co obxectivo de recibir por correo, en formato papel, eses números da revista adaptada ás súas necesidades e intereses.
Isto é posible grazas á participación previa do lector, na propia web, onde ten ao seu alcance ata 56 combinacións editoriais distintas.
A publicación resultante, que vai ser de balde pero de tirada limitada, só vai estar ao alcance da man dos lectores residentes en Estados Unidos.