Red Hat sitúa a España como o segundo país do mundo en actividade ligada ao software libre

De cando en vez xorden novas que non deixan de sorprender por moito que un estea máis ou menos preparado para calquera cousa. Quen o ía dicir, pero segundo Red Hat España ocupa o segundo punto en materia de actividade vinculada ao software libre. Esta sorpresa nosa vén a conto porque, non nos enganemos, estamos a falar dun país onde todo o que se fai a prol da programación aberta semella provir máis de iniciativas concretas que dunha vontade centralizadora que coordine todo o tecido produtor, desenvolvedor e usuario. Por exemplo: por unha banda temos entidades como o noso Centro Mancomún que promoven dende un goberno autonómico o uso deste software e pola outra hai un Goberno central que, malia non estar confirmado totalmente, está a dialogar con empresas de software propietario para dar forma a un programa de achega de ordenadores para os máis pequenos. Enleadas aparte e volvendo ao informe de Red Hat, dicir que os devanditos datos positivos para España están á vista de quen queira velos no seu Open Source Activity Map, un estudo que reflicte a cantidade proxectos abertos que se están a realizar en todo o mundo.
Neste informe, o dito país sae moi ben parado, ocupando un segundo posto e situándose como referencia a seguir en materia de introdución de GNU/Linux e software de código aberto na Administración Pública. No estudo de Red Hat, que sitúa a Francia no primeiro posto da listaxe e a Alemaña no terceiro, téñense en conta factores como as políticas e prácticas de software libre en eidos como o goberno, a industria e a comunidade de usuarios.
O informe compleméntase con outro mapa chamado Open Source Enviroment Map que amosa o contorno aberto que rodea cada país e que pode contribuír ao medre de plans e proxectos de programación libre neses mesmos país. Neste segundo gráfico, as cousas son diferentes para España, xa que aparece no posto 20º.