Detectados virus informáticos que usan a gripe porcina como anzol

A mal chamada gripe porcina (posto que semella que en contra do que indica o seu nome, non afecta aos porcos) está poñendo de relevo dúas grandes circunstancias que nos afectan de cheo. Primeiro: o ser humano está neste intre máis indefenso perante o poder que exercen sobre el os grandes medios de comunicación (que seguen adiante coa súa teimosía de crear unha bonita alarma social que contribúa a facer caixa). Polo tanto, non é de estrañar que aos poucos días de saberse os primeiros casos se esgotasen en España as mascariñas das redes de tendas. Segundo: a Rede é un reflexo fiel dos nosos éxitos, e tamén das nosas miserias. Só así se explica que haxa internautas que se dedican en corpo e alma a analizar polo miúdo cal é o tipo de información que máis lle interesa ao noso subconsciente para desenvolver, en base a iso, o anzol que máis posibilidades amosa de que piquemos. Neste senso, case se podería falar de virus á nosa medida: ese é o xeito de proceder dos usuarios da Rede que están a liberar o equivalente informático da gripe porcina, o virus H1N1, que como é de supoñer, tira proveito directo da alarma social polo andazo espertada na vida real e máis na Rede.
Segundo advirte Trend Micro, xa hai días que se detectaron as primeiras mensaxes advertindo das consecuencias da gripe porcina (e que logo resultaron ser virus ou malware), estando neste intre suxeitas a un máis que inevitable proceso de medre.
“A gripe porcina converteuse nun virus de tipo informático que se aproveita do medo, a confusión e o interese pola información dispoñible na Web acerca do andazo para espallar códigos maliciosos e spam ou infectar equipos informáticos”, sinala Juan Pablo Castro, coordinador de Tecnoloxía de Trend Micro Lationamérica. En certa maneira, a situación é especialmente propicia para os spammers e as súas criaturas, tendo en conta dous factores: por unha banda o interese xerado na Web pola enfermidade (froito en gran parte da saturación á que nos someten os medios tradicionais, xa que a Internet adóitase a usar para ir alén dos datos achegados por esas canles) e pola outra o feito de que andazo teña máis posibilidades de chegar ás multitudes cá xente recluída nos seus fogares.
Polo tanto, dáse a circunstancia de que en casa redúcense as opcións de contraer a gripe real pero soben en boa medida as de ser vítimas do virus informático que leva o mesmo nome. “É a treboada perfecta para os delincuentes de Internet”, comenta Castro, quen sinala que o contido final destas mensaxes non é novo, malia os seus reclamos: trátase dos correos de sempre, con ligazóns sobre milagres farmacéuticos dende as que se cargan virus ou programas espía.