O COETG e INEO desvelaron en Vigo as claves do futuro da banda larga

As tendencias de futuro no desenvolvemento da banda larga, deixaron onte de ser un segredo para os asistentes ao relatorio que organizou en Vigo o Colexio Oficial de Enxeñeiros de Telecomunicacións de Galicia (COETG), en colaboración con INEO para conmemorar o Día Mundial das Telecomunicacións e da Sociedade da Información 2009, e que impartiu o director de Planificación estratéxica de Vodafone España, Enrique Gómez Alonso.
Nel, Gómez Alonso, asegurou que “o futuro da banda larga pasa pola súa mobilidade e polas novas ideas de negocio”, a principal conclusión á que chegou logo de comentar cáles eran, ao seu xuízo, as necesidades dos usuarios das telecomunicacións condicionados polos novos estilos de vida imperantes.
O executivo de Vodafone explicou que “un cliente tipo esixe ubicuidade, rapidez, dispoñibilidade e simplicidade para adaptarse aos novos ritmos laborais”; este perfil axudou a Gómez Alonso a explicar por qué a banda larga é, cada vez máis, “un asunto móbil”, e segundo apuntou, “en España a telefonía celular que ofrece alta velocidade na transmisión de datos está gañando adeptos a unha velocidade tres veces superior ao ritmo ao que se suman clientes á banda larga fixa, xa sexa ADSL ou cabo”.
Asemade, o relator afirmou que a previsión para os vindeiros sete anos é “que se multiplique por 30 o número de clientes deste tipo de banda larga, empregando unha estratexia de despregue escalonado en función da demanda existente”.
Os asistentes ao acto, no que tamén participaron o vicedecano do COETG, Miguel Merino Gil e máis o presidente de INEO, Jorge Cebreiros Arce, tamén puideron reflexionar sobre as ondas de crecemento de Internet, que segundo palabras de Gómez Alonso, “son causadas polas novas ideas de negocio e non polos avances tecnolóxicos”.
Estes avances fan posible achegar cada vez máis á realidade o Fogar Dixital, unha vivenda que, a través de equipos e sistemas e á integración tecnolóxica entre eles, ofrécelles aos seus habitantes funcións e servizos que facilitan a xestión e o mantemento do fogar; aumentan a seguridade, incrementan o confort, melloran as telecomunicacións; aforran enerxía, custos e tempo e ofrecen novos xeitos de entretemento e ocio.
O director de Planificación Estratéxica de Vodafone España concluíu a súa intervención afirmando que é preciso definir un equilibrio xusto entre os diferentes participantes necesarios para o desenvolvemento da banda ancha. Unha esixencia froito da interdependencia dos distintos hábitats, “que obriga a extremar as regras de xogo empregadas”.