O Banco de Tempo de Santiago xa ten espazo web

Dicía un especialista en historia económica que cando todo se vén abaixo no sistema actual, hai dúas cousas que semellan a proba de fallos: a agricultura (sempre haberá mercado para os alimentos) e o troco de bens ou habilidades (un tipo de actividade que se remonta a tempos inmemoriais e que, malia o paso dos séculos, segue a ter un punto máis de lóxica que o emprego dos cartos: papel a fin de contas). De tirar proveito deste novos xeitos de actividade comercial que en realidade non teñen nada de novos e pouco de comercial é do que trata unha iniciativa recente do Concello de Santiago: un banco de tempo dirixido a fomentar a axuda e o beneficio desinteresado entre os veciños. Pois ben, segundo informan o propio goberno local e máis El Correo Gallego, a proposta vén de estrear face visible na Rede, que é o mesmo que dicir que a proposta vén de botar a andar a efectos prácticos.
A web, neste caso, será algo máis que unha web ou unha simple achega de información: do que se trata é de que sirva de gran taboleiro de anuncios a cumprimentar por todas e todos os usuarios achegando información de todo tipo: dende ofertas concretas para intercambiar habilidades (coñecementos en xardinería ou electricidade por cursos de idiomas, por poñer un exemplo) ou ben propostas para trocar, temporalmente ou non, uns obxectos por outros.
Segundo sinala o Concello, non se trata de favorecer o beneficio económico dos cidadáns, senón de promover o trasfego de algo máis inmaterial e, practicamente sempre, de moitísimo máis valor: o que sabe facer cada quen. A iniciativa, que provén da Concellería de Benestar Social, responde a un interese por tentar mellorar a calidade de vida das veciñas e veciños. Por certo que á web onde se resume e se dá acubillo á proposta éntrase a través da propia páxina do Concello: unha vez que a carguemos, cómpre baixar a pantalla e premer en Banco do Tempo.