Empresarios de éxito na Rede unen forzas dende Madrid para botar unha man en novas iniciativas

Nun mundo ideal, todas as empresas que xurdiran ao abeiro da Rede, feitas para a Rede, terían máis que asegurada a súa supervivencia a curto, medio e longo prazo. Todo o mundo sería cliente potencial e real, e a competencia acabaría funcionando como un teléfono de axuda gratuíto e eficaz. Con todo, a posibilidade de vivir nun mundo desta índole, se é que algunha vez a houbo, hai tempo que se nos escapou. Conclusión: o éxito segue ao alcance duns poucos. Co obxectivo de facer todo o posible para ampliar esta marxe, vén de xurdir dende Madrid a Asociación de Investidores e Emprendedores en Internet (AIEI), un colectivo que, como o seu propio nome indica, diríxese a acurtar distancias na Rede entre os que teñen os cartos para investir e os que teñen as ideas para atraer eses cartos. O lema de Ángel María Herrera, de Bubok (na imaxe, explicando o cometido da AIEI), xa fala por si só: “Unha boa idea en Internet non abonda”.
Segundo se nos conta en Silicon News, outro dos grandes obxectivos da plataforma é achegar consellos para a posta en marcha dunha iniciativa de tipo empresarial na Rede, sendo a primeira destas recomendacións unha á que non lle falta a súa lóxica: atender ás experiencias doutros empresarios de éxito xa consumado na Internet e mesmo seguirlles o ronsel como se a súa vida en liña fose un manual no que inspirarse.
Por certo que entre as empresas que veñen de lanzar a Asociación atopamos casos deste tipo: empresarios cunha certa traxectoria e que puideron ter contacto directo cos distintos cambios de rumbo que foi dando a cousa dixital (ultimamente moi dirixida a fomentar a entrada en xogo total dos internautas). Outro dos consellos achegados é o seguinte: facer fincapé na solvencia e rendibilidade do plan que se ten entre mans, porque iso precisamente é o que procuran os investidores. Para a Asociación, en contra do que se pensa, a crise non é un muro entre os cartos e os emprendedores, senón máis ben un novo xeito de comunicación e mesmo unha oportunidade. De feito, din, as compañías que xurdan arestora terán máis posibilidades de seren máis fortes, sendo como é o escenario no que nace un escenario convulso, polo que precisan alicerces máis firmes.