Caixanova e IBM abrirán antes de que remate 2009 un centro tecnolóxico en Ourense

Caixanova e IBM (a través da súa filial INSA) veñen de asinar un acordo dirixido a afianzar a innovación tecnolóxica na nosa terra. O achegamento entre ámbalas dúas partes, segundo deron a coñecer estes martes 14 nun acto oficial que contou coa presenza do presidente da Xunta (Alberto Núñez Feijoo), comezará a materializarse coa apertura dun Centro de Innovación Tecnolóxica (CENIT) de Ourense, complexo tecnolóxico que iniciará a súa actividade antes de que finalice este ano en curso. Este CENIT, que formará parte dunha rede de emprazamentos especializados na produción de programas e servizos informáticos, servirá (en palabras de Caixanova) para evitar a fuga de talentos galegos ou formados aquí, contribuíndo de igual xeito a atraer persoal cualificado de fóra. Por certo que a participación activa de Caixanova deixarase notar nas especificidades do Centro. “Neste senso”, engade a entidade financeira, “o espazo de desenvolvemento xorde coa vocación de ser un referente a nivel nacional no eido da tecnoloxía aplicada ao sector bancario”.
O obxectivo de IBM e Caixanova é que o edificio conte antes de que remate o ano cun equipo de traballo de 50 persoas, deixándose marxe de abondo para acadar os cincocentos empregos ao longo dos anos vindeiros, dependendo da evolución do negocio e da resposta por parte do empresariado.
O seu cometido específico será achegarlle innovación a Caixanova (mellora das aplicacións e servizos, redución de custes), pero segundo apuntou a entidade tanto os froitos de traballo como o alcance do mesmo irán alén deste eido particular. De feito, puntualizou, está previsto que desenvolva diferentes proxectos tecnolóxicos para outras empresas tanto españolas como estranxeiras, co obxectivo de mellorar a súa competitividade e rendibilidade a través do deseño e mantemento de aplicacións.
O CENIT Ourense operará en conexión cos outros dos centros desta índole que INSA mantén habilitados en España: CENIT Aldeatejada de Salamanca (na imaxe) e CENIT Cáceres, así como coa rede internacional de emprazamentos de innovación da casa IBM. O principal beneficio disto é a ampla marxe para compartir recursos que se pon en xogo, o que tamén se traduce en apoios de todo tipo sempre que a situación o requira.
Para Caixanova, tamén son evidentes as vantaxes que o proxecto ten para a nosa terra: con este acordo con IBM, sinala a entidade galega, reforzarase o sector das novas tecnoloxías da información e impulsaranse iniciativas sectoriais e acordos de colaboración “que permitan aproveitar ao máximo as sinerxías entre as empresas e as institucións involucradas”.
Máis información na sala virtual de prensa de IBM.