A II Campaña de Software Legal radiografía o sector do software español nunha Canle Multimedia

Dentro do portal da II Campaña de Software Legal, promovida polo Ministerio de Industria, púxose en marcha unha canle multimedia na que se está a realizar unha fotografía dos principais actores do sector do software en España e de persoas e institucións que colaboran no respecto pola Propiedade Intelectual en materia de software.
Actualmente conta con 28 vídeos nos que se recollen as percepcións, valoracións e opinións de responsables de asociacións, centros nacionais, compañías de fabricación, distribuidores de software, profesores universitarios e empresas do sector de videoxogos. Tamén está dispoñible nas plataformas de Youtube e Dailymotion.
A Canle Multimedia quere colaborar co desenvolvemento do mercado de software español e, á vez, sensibilizar á sociedade acerca do valor que ten un programa informático, coñecer de primeira man as opinións dos profesionais do sector, analizar as novas tendencias e fórmulas de venda que marcarán a evolución deste segmento de actividade durante os próximos anos e mostrar modelos de negocio exitosos relacionados co desenvolvemento e a distribución de software.
Na canle pódense encontrar entrevistas a directivos de empresas de software propietario como Txema Arnedo, Director de Desenvolvemento da Propiedade Intelectual de Microsoft, ou Alfons Sort, Director Xeral de Adobe España; casos de éxito de empresas dedicadas ao desenvolvemento de software libre, como Ándago Ingeniería; vídeos sobre novas tendencias para protexer un desenvolvemento, como Escrow Spain; proxectos universitarios para fomentar o respecto pola Propiedade Intelectual dende a Educación como o Proxecto Educar para crear da Universidade de Alcalá, en colaboración con Cedro, Microsoft Ibérica, MPA, NBC Universal Telefónica e que tamén contou con participación da Consellaría de Educación e Ciencia do Principado de Asturias; percepcións dos principais actores do sector de videoxogos, como Virtual Toys, DOID, FX Interactive ou Nerlaska; ou pezas que recollen a visión que teñen da campaña os diferentes actores que colaboran nela: CENATIC, BSA, AETIC e ADDETI.