100.000 usuarios de Ryanair optan pola confirmación de reserva a través de SMS

A compañía de voos a baixo custe Ryanair vén de facer reconto dos usuarios que lle tiraron partido ao servizo de reservas vía SMS recentemente posto en xogo pola empresa en colaboración con 15Bellow. Segundo fontes da mesma, foron máis de 100.000 os clientes que ao longo do primeiro mes de vida do servizo optaron por recibir as confirmacións das súas pasaxes por esta vía. A iniciativa, á que se pode optar polo prezo dun euro, permite o aforro das reservas pola vía do correo electrónico, amais de ter que procuralas nos computadores logo de levar a cabo a operación de check-in. Segundo informa a compañía, os pasaxeiros que máis empregan estes servizos son os italianos (16%) seguidos dos ingleses (15%) e dos españois (12%).
Por certo que dende a Cidade do Vaticano mesmo se chegou a bendicir o servizo en cuestión ao longo das pasadas catro semanas, con ata 16 residentes do pequeno país optando por recibir as súas confirmacións mediante os seus teléfonos móbiles.