A Asociación de Empresarios de Bergondo organiza cursos de iniciación aos segredos da informática

Seguimos dando conta de actividades formativas postas en marcha na nosa terra para ir abríndonos as portas aos segredos e vantaxes da Sociedade do Coñecemento. Entre as iniciativas que comezan de xeito máis inmediato (e que centran o seu programa no tema que nos ocupa: as redes e o dixital) atopamos as que está a promover a Asociación de Empresarios de Bergondo en colaboración co Concello, dous Cursos de Iniciación á Informática de sesenta horas de duración e a desenvolver durante o mes de outubro. Segundo informa a dita Asociación, as sesións formativas serán en horario de mañá e de tarde (a elixir) e están dirixidos a todas/os aquelas/es que queiran abrirse camiño na era dixital e nos seus recursos, especialmente axeitados para ampliar currículo, formación e máis posibilidades de comunicación.
Máis polo miúdo, achegaranse claves teóricas e prácticas para adquirir coñecemento básico sobre o manexo dun computador, programas de ofimática, acceso e navegación por Internet ou manexo do correo electrónico.
Segundo informa a organización, as persoas interesadas poderán formalizar de balde a súa inscrición na Casa de Cultura do Concello de Bergondo ou na sede da Asociación de Empresarios de Bergondo entre os días 14-25 de setembro. Para calquera dúbida poden chamar aos teléfonos 981 791252 / 981 795062.