A compostelá Bahía Software recibe un novo certificado de calidade

En cuestión de competitividade empresarial tecnolóxica, os avais son coma as chaves que abren as portas. Ou mellor dito: directa ou indirectamente, o que fai que alguén seleccione o teu produto ou servizo en detrimento de outros. Certificacións hainas de todo tipo, pero algunhas son especialmente salientables polo que se esixe de esforzo para acadalas. Un exemplo disto é a Certificación ISO 20000, acreditación de calidade que reúne no estado español a un número reducido de organizacións. Pois ben: ao grupo de escollidas vén de sumarse unha nova integrante. Falamos da empresa galega Bahía Software, especializada en servizos de consultoría e tecnoloxías da información e con sede na rúa Monte dos Postes de Santiago.
Con este aval, informa a compañía, acádanse os obxectivos claves para 2009 en materia de calidade dentro da propia empresa. Con todo, a certificación non colle a Bahía sen experiencia nestes procesos: cómpre sumar o devandito aval aos obtidos previamente, o ISO 9000 e o CMMI. A nova certificación, obtida a través da organización internacional IT Service Management Forum, garante a calidade dos servizos achegados por Bahía, en base a un plan estruturado de desenvolvementos de servizos tecnolóxico-dixitais. “A aplicación destes procedementos e metodoloxía recoñecidos no eido internacional”, informa a empresa galega, “permite o control dos servizos que subministra, axustándoo aos obxectivos do cliente a través de parámetros medibles”. Isto, engade, reverte nunha mellora continua do servizo e garante a xestión óptima e rendible dos recursos.
Dirixida ás solucións de asistencia (outsourcing, soporte a usuarios, soporte técnico), a ISO 20000 define os requirimentos que ten que cumprir unha organización para subministrar servizos xestionados cunha fiabilidade, seguridade e calidade axeitadas.