Prospera a causa xudicial de Apple contra Psystar

Psystar comezou a vender en 2008 uns ordenadores persoais configurados para funcionar co sistema operativo Mac OS X, de xeito que era o máis semellante a equipos de Apple de baixo custo, o que molestou á compañía de Steve Jobs, polo que emprenderon accións xudiciais contra eles, o que vai camiño de concluír, con mal resultado para a compañía que vendía os clons de Mac, posto que xa hai unha sentenza na súa contra, que considera que a modificación do Mac OS X para funcionar en equipos non fabricados por Apple supón unha infracción do copyright (amparándose na DMCA).
Chegouse a este punto despois de que Psystar non fose capaz de defender en sede xudicial que as normas de uso de Mac OS X van contra as leis anti-monopolio. Agora, Psystar tamén podería ter que enfrontarse a outras acusacións coma violación de contrato, infracción de marca e competencia desleal, polo que dá a impresión de que, pese a que queda moito camiño nos xulgados para rematar con esta polémica, todo apunta a que Apple foi quen de defender o seu produto ante a comercialización do seu sistema operativo en PC.