A incorporación de máis canles á TDT de pago está demorada sine die

A volta da TDT de pago a España está a ser toda unha decepción, de xeito que Gol TV só capta a través desta plataforma o 11% dos seus abonados, de aí que o resto de canles que tiñan pensado pasar á TDT Premium sexan prudentes e prefiran pospor tal medida, de xeito que o anuncio de Dahlia TV asegurando que AXN substituiría a SETenVEO na TDT en setembro e englobaríase nun paquete de 3-4 canles de pago aos que o público podería subscribirse por uns 8 euros/mes tería sido moi precipitado.
Dende AXN non realizaran ningún comunicado público a tal efecto, e agora dende Dahlia TV, compañía que leva dous anos proclamándose como valedora da TDT de pago, recoñecen nunha entrevista que o seu proxecto empresarial está conxelado, e non existe data para o seu lanzamento futuro, o que non impide que dean detalles coma que o servizo estaría centrado a unha programación familiar con películas, series e lecer (sen canles para adultos) e limitándose á televisión en definición estándar. Unha oferta que dificilmente encaixa nun mercado no que a televisión por satélite, cable e ADSL están a achegar moitas canles e paquetes e incluso contidos en alta definición, de aí que non parece ter moito sentido apostar por unha limitada TDT de pagamento.