Universal anuncia o lanzamento de películas en discos híbridos Blu-ray/DVD

Ante a guerra de formatos de alta definición, varias compañías propuxeron comercializar discos híbridos de HD DVD e Blu-ray, para que os consumidores puideran apostar sobre seguro, aínda que o que si chegamos a ver nas tendas foron películas editadas nun formato combo HD DVD e DVD, de xeito que nunha cara dos discos incluíase unha copia en alta definición e na outra unha en definición estándar, o que fai que o consumidor poida reproducir a obra en dispositivos que non sexan compatibles co agora desaparecido HD DVD, aforrando a compra da película en varios soportes.
Agora a Universal anuncia que vai repetir a operación, e vai lanzar a coñecida triloxía de Bourne en discos de dobre cara Blu-ray/DVD, que sairán ao mercado norteamericano o 19 de xaneiro. Non estamos ante un caso illado, e a compañía pretendería comercializar inicialmente 59 discos Blu-ray/DVD de dobre cara e dobre capa por cada unha (de xeito que terían unha capacidade de 50 e 9 Gb por cara).
Este tipo de lanzamentos buscan animar aos consumidores a adquirir as súas novas películas en alta definición, aínda que como atranco ten un incremento de custos que pode ser unha eiva para a súa xeneralización, así coma o feito de que os discos de dobre cara son sumamente incómodos.