LaSexta realiza probas de emisión en alta definición

Nas últimas semanas a TDT está a someterse a múltiples probas para acoller a novas canles que aínda non remataron de definirse, e mentres botan a andar NITRO e Canal+ Dos (arrebatando esta última canle o seu espazo a 40 Latino) e outros programas preparan o seu lanzamento oficial (coma MTV e Boing) temos que LaSexta está a experimentar no dixital atrevéndose incluso coa alta definición, de xeito que algúns afortunados puideron ver a pasada fin de semana o partido de baloncesto no que España enfrontábase a Estados Unidos, no marco do Mundial que ten lugar en Turkía, pois a canle LaSexta 2 (en probas) mudou en LaSexta HD para achegar un sinal de vídeo en MPEG-4 cunha resolución de 1.440 x 1.080 píxeles a 4,1 Mbps (e un audio a só 128 Kbps), o que queda bastante afastado da calidade de TVE HD (con 1.920 x 1.080 píxeles a 8 Mbps).
Aínda que a calidade desta retransmisión era bastante reducida (debido á alta compresión), entendemos que LaSexta deberá optar agora por contar con 2 canles de definición estándar ou 1 de alta definición, resultando esta última moi interesante para o público, que considera que o número de programas dispoñible na TDT é excesivo, mentres que a súa calidade é moi discutible. Na actualidade só está confirmada unha canle de alta definición para todo o territorio español a través da TDT (TVE HD), polo que sería de agradecer que algunha canle privada decidise seguir ese mesmo camiño, para que as emisións en HD fosen algo máis que unha anécdota en España. No caso de LaSexta hai rumores de que poderían estar a facer probas técnicas de cara ao lanzamento dunha canle de alta definición de pagamento (posiblemente cos contidos deportivos de Gol TV).

O partido de España-EE.UU. puido seguirse en alta definición a través dunha canle de TDT en probas