FECYT celebrou este mércores os seus 10 anos de divulgación científica

A Fundación Española para a Ciencia e a Tecnoloxía (FECYT), vén de cumprir 10 anos de intenso labor de innovación e divulgación das ciencias por todo o Estado, e celebrouno, como non podía ser doutra maneira, por todo o alto no Xardín Botánico de Madrid.
Alí tivo lugar un acto ao que asistiron as principais figuras e autoridades do entorno científico español, como os antigos directores da Fundación, Arturo García Arroyo, Joan Comella, Eulalia Pérez Sedeño e Juan Tomás Hernani, que viron recoñecido o seu labor á fronte da Institución; así como a actual directora xeral, Lourdes Arana, que foi a encargada de dirixir o acto.
Dende a súa creación, FECYT foi a entidade designada polo Ministerio de Ciencia e Innovación para dar cobertura á súa área de comunicación e divulgación, de maneira que a súa actividade estivo centrada principalmente en achegar a ciencia e a innovación á sociedade, ao tempo que se xeraban novas vocacións científicas e se lanzaban no eido internacional.
Entre outros temas de interese científico, o acto dou lugar a un debate sobre o papel que cumpren os novos medios sociais como ferramenta de comunicación na sociedade, no que participaron, ademais de científicos e catedráticos de distintas materias, Ramón Núñez, director do Museo Nacional de Ciencia e Tecnoloxía, MUNCYT, e Mónica Salomone, periodista científica, que actuou como moderadora.
O evento tamén serviu para presentar o libro 10 anos de divulgación científica en España, editado polo FECYT en conmemoración do seu aniversario, que estará dispoñible na web da entidade, para tódalas persoas interesadas.