O Master galego de Computación de Altas Prestacións contará co apoio do eido privado

Co principal obxectivo de formar a profesionais, tecnólogos e investigadores, no campo da xestión de instalacións, arquitectura de computadores e computación de altas prestacións, as universidades de Santiago de Compostela (USC) e a Coruña (UDC) veñen de unir forzas co CESGA para desenvolver o Master Interuniversitario de Computación de Altas Prestacións, que conta coa colaboración de destacadas empresas do sector como HP, Bull, IBM, Fujitsu, AMD, Intel, Gompute e a galega Dygra Films.
A formación académica, de investigación e de transferencia de tecnoloxía que incluirá este Master, permitirlle aos alumnos e alumnas incorporarse nun futuro próximo a centros ou departamentos de innovación, investigación e desenvolvemento; así como a parques tecnolóxicos ou centros de alta tecnoloxía, onde desenvolver todo o seu potencial.
Asemade, dada a súa formación académica, o máster mesmo lle permitirá ás persoas inscritas levar a cabo a realización de doutoramentos na área de Computación de Altas Prestacións e seguir investigando neste eido, do que din, “a súa demanda de expertos aumentará na industria debido á necesidade de resolver problemas cada vez máis complexos como o simulado de procesos ou o modelado predictivo”.
A presentación do Máster terá lugar mañá martes, 14 de xuño, ás 12:00 horas, no Centro de Supercomputación de Galicia (CESGA), e contará coa presenza, entre outros, do seu presidente e director xeral de I+D+i da Consellería de Economía e Industria da Xunta de Galicia, Ricardo Capilla Pueyo, o Reitor da UDC, José María Barja Pérez e o Reitor da USC, Juan Casares Long.