O futuro Campus da Auga contará cun centro de desenvolvemento de software de seu

O reitor da Universidade de Vigo, Salustiano Mato, achegouse esta semana ata o campus de Ourense para comprobar de primeira man o bo transcorrer do proxecto de creación do Campus da Auga na cidade, unha iniciativa estratéxica que vinculará tódalas áreas de investigación que sobre a auga e o termalismo se leven a cabo na entidade académica.
O Campus da Auga, ligado ao Campus do Mar (de Vigo), pretende darlle pulo ao crecemento económico do sur de Galicia, nunha interconexión co Norte de Portugal e Castela e León, para o que contará, entre outras cousas, cun centro tecnolóxico de desenvolvemento de software propio, dende o que se cooperará co sector privado para achegar solucións adaptadas ás necesidades propias da cidade, ligadas á auga e ao termalismo.
Esta é, en palabras do propio Mato para o xornal Faro de Vigo, “a peza máis avanzada do proxecto”, sendo nesta parcela, a das novas tecnoloxías, onde campus ourensán conta con máis experiencia, ao dispor xa “dun grupo de desenvolvemento maduro”.