SPIN ofrece un álbum tributo a Nirvana a través de Facebook

Este ano é o 20º aniversario do álbum Nevermind de Nirvana, e para celebralo, a revista SPIN decidiu preparar unha homenaxe ao mesmo a xeito de versións por outras bandas como Meat Puppets, Midnight Juggernauts, The Vaselines, Titus Andronicus e Telekinesis entre outras, que poderá conseguirse co número de agosto da publicación, aínda que dende hoxe mesmo tamén é posible descargar o disco a través de Facebook, premendo no botón de Gústame da páxina da revista e introducindo un enderezo electrónico nun formulario para recibir unha ligazón para descargar o álbum en formato MP3.
Na edición dixital de SPIN tamén podemos atopar unha galería fotográfica con distintos artistas que explican o que Nevermind supuxo para eles e unha explicación sobre a fotografía que ilustra a portada do seu número de agosto.
A revista musical leva un tempo aproveitando os novos soportes para reinventarse, e como exemplo diso está a súa aplicación para iPad, que permite a adquisición de exemplares dixitalizados da publicación por 1,99 dólares (ou subscricións anuais por 7,99 dólares) que, aparte dos contidos da edición impresa, tamén integran ducias de entrevistas en vídeo e actuacións, e 60 cancións ao mes que poden escoitarse a través de streaming, o que supón un auténtico valor engadido.