HP abandona os seus produtos con webOS

Hai cousa dun ano HP pagou 1.200 millóns de dólares por Palm, nunha adquisición xustificada polo feito de que coa empresa en decadencia incluíase o seus sistema operativo webOS, que podería servirlle como base para avanzar no sector dos móbiles e dos tablets, pero finalmente non parece que fixeran un bo negocio, pois HP vén de confirmar que vai cesar a súa liña de dispositivos con webOS, concretamente o tablet HP TouchPad e os móbiles HP Pre³ e HP Veer, aínda que matizando que explorarán opcións para poder continuar a tirar proveito do webOS.
Nos últimos meses dende HP desmentiron varias veces os rumores que apuntaban a que o HP TouchPad estaba a ter unha acollida moi mala (comentan que o número de unidades vendidas podería non chegar ao 10% das distribuídas), o que os levaría a abandonar o produto, pero que finalmente parecían ter bos alicerces, como demostra o que moitos xa consideran como a morte de webOS (aínda que é posible que algún outro fabricante decida integrar este sistema operativo nos seus equipos).