Recoñecen ao Sonim XP3300 Force como o teléfono móbil máis resistente do mundo

O representantes comerciais para España e Portugal de Sonimtech, asentados en Galicia, veñen de comunicarnos que o seu teléfono móbil Sonim XP3300 Force acadou hai un par de semanas o recoñecemento do Teléfono Máis Resistente do Mundo por parte do Libro Guinness dos Records, xa que o seu terminal ultra-reforzado conseguiu sobrevivir a unha caída de proba de 25 metros sobre o cemento, sen sufrir ningún dano no seu funcionamento.
A anterior marca rexistrada polo Guinness estaba en 3,25 metros, pois os terminais tenden a estar deseñados para caídas de pouco máis dun metro de altura, o que non parece suficiente para certos contornos (como obras ou mesmo bosques), de aí que o Sonim XP3300 Force leve a súa resistencia máis aló doutros terminais que cumpren coas especificacións de grao miliar, de xeito que poden sobrevivir a caídas, soportan que un coche pase sobre eles e incluso poden superar a submersión en xeo.

Concretamente o Sonim XP3300 Force é un móbil GSM deseñado para contornos moi duros, conta con certificacións IP-68 (pode somerxerse 1 horas a 2 metros de profundidade) e MIL-810G (para sal, néboa, humidade, golpes e choques térmicos), resiste caídas a 2 metros sobre o cemento en calquera ángulo, está protexido para vibracións entre 5 Hz e 500 Hz, pode operar a temperaturas de entre -20 e 55 graos centígrados, as súas teclas son o suficientemente espaciadas para permitir o seu uso con luvas, a súa pantalla de 2 polgadas ten unha alta visibilidade (280 cd/m²) e incluso goza de funcións avanzadas como cámara de 2 Mpíxeles con flash LED, lanterna LED, GPS, Bluetooth 2.1, micrófono con cancelación de ruído, radio FM, reprodutor multimedia e lector de tarxetas microSD de ata 16 Gb. Sen dúbida, unha opción para ter en conta por parte de profesionais que se movan en contornos industriais ou en condicións moi adversas nas que non poidan prescindir de estar comunicados polo móbil.

Reportaxe sobre o recoñecemento acadado por Sonimtech