YouTube permite converter en 3D os nosos vídeos 2D

Para contribuír á calidade dos seus contidos, dende YouTube anuncian novas funcionalidades para o seu sistema, que facilitarán a creatividade dos seus usuarios á hora de realizar as súas propias producións, como o feito de que todos os usuarios verificados e sen infraccións de copyright poderán subir vídeos de máis de 15 minutos, poderán gravar, editar e compartir vídeos con Vlix e Magisto e contarán coas ferramentas para converter vídeos 2D en 3D cun único clic.
A subida de contidos sen límite de duración xa estaba a aplicarse de xeito selectivo a moitos usuarios de YouTube, polo que a xeralización desta medida xa era esperada, pero a incorporación dun sistema que fai compatibles os vídeos 2D co formato de YouTube 3D é toda unha sorpresa, pois aínda que actualmente moitos televisores e monitores 3D inclúen a prestación de simular o 3D en vídeos 2D, o feito de que YouTube dea este paso facilita este salto (aínda que amosando uns resultados dunha calidade moi inferior a unha gravación cunha cámara 3D).
A incorporación de Vlix e Magisto a YouTube a través da opción de Crear vídeo fai que sexa doado aplicar efectos de vídeo e engadirlles texto (con Vlix) así como facer dun xeito moi doado vídeos moi divertidos coas nosas gravación (con Magisto) sen precisar de coñecementos de montaxe de vídeo.