Álex Quintana amosa en Vigo as claves para adaptármonos á publicidade en liña

As xornadas Fálame do teu 3.0, organizadas na Universidade de Vigo para pór sobre a mesa diferentes xeitos de entender a comunicación, hoxe en día máis vinculada ás redes sociais que nunca, contaron os días pasados coa presenza do creativo Álex Quintana, da axencia de publicidade Arista, de Euskadi, quen amosou algúns dos principais retos aos que nos temos que someter, desexémolo ou non, de querer lanzarlle hoxe unha mensaxe ao mundo. Pois ben, ao seu xuízo, non é de todo certo que haxa dous mundos, un real e outro dixital, ao que dirixirse cun anuncio determinado. Mellor dito: hai dous mundos pero unha única audiencia.
É dicir, no ámbito dixital, o consumidor non é un cyborg nin un ser distinto, segue a ser igual de real. Esta estratexia de publicidade dupla, cunhas mensaxes nas redes que nunca se lanzarían nas canles de publicidade tradicional, é unha cousa difícil de comprender, sinalou Quintana. Ao seu xuízo, estamos ante unha moi clara falta de coherencia e ante unha necesidade de buscar comportamentos máis ou menos lóxicos das axencias, estean na contorna real ou na dixital, “pois quen está detrás das pantallas segue sendo o consumidor de toda a vida”, sinalou. Neste senso, avogou por facer o preciso para non perdermos a perspectiva por moita revolución dixital que se dea: a inseguridade ante o descoñecido non debe levarnos a pensar que hai que comezar dende arriba, correndo sen ter camiñado antes. Para afianzarse na contorna dixital, o creativo aconsellou que o mellor é que a marca comece dende abaixo, xa que “o nome e a potencia en medios non é garantía de éxito en internet”. Entre os casos concretos que expuxo para explicar esta situación e que a Universidade de Vigo documentou na súa web a raíz do relatorio de Quintana, figura unha metáfora, a de que Facebook era coma un edificio onde os clientes conviven cos seus anunciantes. Porén, “a marca só ocupou un andar dos dispoñibles e non pode pretender que, porque monte unha festa, vaia ter méritos e aceptación, ten que ser antes coñecida polos veciños”, dixo.