En marcha Piratas de Galicia para loitar a prol da liberdade na Internet

Xa temos na nosa terra unha iniciativa equivalente ao Partido Pirata, ou Piratpartiet, esa organización sueca que baixo a bandeira do libre intercambio de información na Rede e da man de Christian Engström conseguiu, entre outros logros a ter en conta, facerse cun oco na Eurocámara. A versión galega desta proposta, con todo e malia ser herdeira da fronte nórdica, ten as súas particularidades, e está ben que así sexa. Pirata.gal aposta de cheo pola democracia participativa e semella beber aínda máis das fontes do 15-M, que, como todos sabemos, basea unha boa parte do seu poder de convocatoria no potencial das redes sociais. “Votándolle a Pirata.gal”, sinalan os promotores da iniciativa, “estás a votar por ti mesmo”.
Na páxina web desta nova fronte político-internauta sinálase outro piar ideolóxico a ter en conta: a defensa dos dereitos e liberdades dos cidadáns, cada vez máis na picota se temos en conta o que se nos di dende as plataformas sociais acerca do que queren facer as grandes corporacións, collidas da man dos Gobernos que máis lles fan as beiras, con todo o que teña que ver co fluxo da información.
Outro dos piares, tal e como se dá a entender no propio nome da iniciativa, é unha aposta clara pola actualización das leis de patentes e de dereitos de autor á época e contexto actual, “actualización”, infórmase, “que permita mellorar a innovación así como preservar os dereitos dos autores mentres se garante o acceso da cultura á cidadanía”. Piratas de Galicia tamén defenderá a base de liberdade que asenta a Internet que coñecemos, a súa neutralidade, así como todo o que teña que ver cos movementos de software libre e programación aberta, unha liña de achega informática menos gravosa para a cidadanía que a do software pechado, que nos obriga ao pago de licenzas.