O grupo Gis-T abre a preinscrición para o seu curso de promoción territorial e telecomunicacións

O grupo Gis-T Idega da Universidade de Santiago, responsable entre outras cousas do portal de innovación comercial para as nosas explotacións rurais, granxafamilar.com, vén de abrir o prazo para a preinscrición no curso de perfeccionamento en Marketing Territorial e Telecomunicacións, unha achega formativa propia, destinada a promover novas fórmulas para o desenvolvemento local, fórmulas que pasan en boa medida pola potenciación en liña das identidades e polo aproveitamento racional e rendible de todo aquilo no que salienta un lugar, unha comarca ou un país determinado.
A preinscrición, informa a USC, poderá formalizarse ata o día 1 de marzo, abríndose a continuación o período de matrícula que se estenderá ata o día 19 dese mesmo mes.
O curso capacitará ao alumnado na análise e discusión de casos de planeamento estratéxico e mercadotecnica territorial dende unha perspectiva internacional, na aplicación destas metodoloxías en municipios en concreto á vez que posibilitará o estudo do impacto das telecomunicacións no desenvolvemento económico rexional. “Esta variante do marketing”, informa o grupo Gis-T, “bota mans das novas tecnoloxías da información, a telemática e as metodoloxías das ciencias xeográficas, económicas e da administración e dirección de empresas, co obxecto de constituír proxectos de desenvolvemento en beneficio da sociedade”.