O Canto do Pobo: proxecto web para divulgar e preservar os nosos cantos de cego

A cultura popular non está rifada coa Rede. Exemplos de boa sintonía entre unha cousa e outra (as redes como canle de preservación e divulgación do que vén de vello) hai unha manchea deles, pero se cadra dos máis recentes haxa poucos tan representativos do que estamos a dicir como O Canto do Pobo, un proxecto-web que acubilla no ámbito dixital, á vista dos galegos presentes e dos futuros, o importante labor de documentación levado a cabo por Xosé Luís Rivas Mini e Baldomero Iglesias Mero entre os anos 1972 e 1998 sobre un alicerce cultural ben concreto: os cantos de cego. A web, por certo, vén de incorporar un mapa en liña, por comarcas, onde se sitúa e se detalla cada canto.
A través do mapa en cuestión, ademais, achégase a gravación, a letra e máis a partitura de tódalas pezas reunidas. Como dixemos, o traballo dispoñible na Rede vén de antigo: trátase da adaptación á Internet do labor de documentación realizado por Mini e Mero, publicado no seu día en dous volumes con CDs co título Cantos, coplas e romances de cego e que agora está dispoñible de xeito íntegro na devandita web. Segundo se recolle na web do Consello da Cultura Galega, a temática é do máis variada, mais salientan, de entre tódolos cantos, os acontecementos senlleiros ou a narración de historias de amor estragadas.
A web, que conta co apoio da axencia AGADIC, amais de permitirnos manter unha xanela aberta a esta parte da nosa cultura popular, en claro risco de esquecemento, tamén nos deixa marxe para botar unha man no seu labor de preservación. De feito, os interesados en contribuír á recuperación tamén poden achegar as súas propias recolleitas ao sito en liña O Canto do Pobo.