Tredess amosará en SICUR as súas últimas novidades en vídeo supervisión

A santiaguesa Tredess, pertencente ao grupo Televés, vén de confirmar que estará presente, os días vindeiros, nunha das citas estatais máis importantes do sector da seguridade e as novas tecnoloxías e ferramentas aplicadas á protección persoal, do fogar e das empresas. Falamos da feira SICUR, a desenvolver en Madrid, no IFEMA, entre o 28 de febreiro e o 2 de marzo, “o punto de encontro dos axentes de mercado de toda España e Europa e escaparate por excelencia da oferta global, o avance tecnolóxico e a innovación ao servizo da seguridade”.
Tredess, que tamén centra unha boa parte da súa actividade no deseño e na fabricación de sistemas e equipos para TDT, estará en Madrid para informar, polo miúdo, das súas últimas novidades en materia de desenvolvemento de recursos de vídeo supervisión. Estas solucións, informa a propia Tredess, están equipadas ademais con sistemas de marcado de auga dixital (watermarking) para autentificación das imaxes rexistradas e algoritmos de análises de contido do vídeo. Os principais clientes nesta área de negocio son estudos de arquitectura, enxeñarías, empresas públicas e privadas e empresas instaladoras de redes de telecomunicacións.