Forte presenza galega no Rio Content Market de Brasil

As nosas empresas do audiovisual seguen a pisar forte, e non só na nosa terra. Dende hoxe mesmo, mércores 29, e segundo informa o CLAG, contamos cunha avanzadiña de primeira orde nun evento que tamén é, en definitiva, de primeira orde: o Rio Content Market, mercado internacional emprazado en Rio de Janeiro que mantén abertas as súas portas ata o 2 de marzo e que serve entre outras cousas para botar abaixo o meirande número de posibles atrancos no camiño da internacionalización. A dita avanzadiña está formada por empresas que, en maior ou menor medida, apoian a súa actividade no emprego das novas tecnoloxías da información. É o caso de Moonbite, de quen temos falado nesta web para informar das súas interesantes achegas no eido dos videoxogos.
En compaña de Moonbite tamén estarán Continental, Ficción e Zoa Media. Todas elas presentarán en detalle os contidos perante a industria audiovisual brasileira e do resto do mundo.
A asistencia a este mercado está cofinanciada polo Instituto Galego de Promoción Económica (IGAPE), a través dun convenio de colaboración co Cluster Audiovisual Galego para “impulsar a internacionalización das empresas do sector, vixente dende o ano 2010”. O convenio de colaboración entre o IGAPE e o CLAG abrangue actividades como por exemplo a asistencia a mercados como IBC Amsterdam, Cartoon Movie, FICOD ou Broadcast, entre outros.
Segundo informa o Cluster no Facebook, a “presenza do CLAG en Rio Content Market 2012, permitiralles ás empresas do audiovisual galego crear novas oportunidades de negocio para os contidos audiovisuais e multiplataforma en América Latina; así como coñecer de primeira man discutir e presentar as tendencias e innovacións no campo dos contidos multiplataforma”.
Por parte do CLAG, a súa xerente, Mar Varela, reunirase durante a feira con Rachel do Valle, directora de Internacional de Brazilian TV Producers, para explorar posibles canles vías de colaboración entre as entidades.