A CIG pon en marcha unha web para dar conta polo miúdo da reforma laboral

Para quen queira saber un pouco máis, dende unha óptica sindical galega, da reforma laboral que prepara o Goberno español, dicirlle que a CIG vén de pór en marchar unha completa páxina web, moi visual e clarificadora, sobre a devandita iniciativa acerca dos dereitos dos traballadores e as accións preparadas dende a nosa terra para contrarrestala. A web, máis que unha xanela para ver as cousas que se están a preparar dende a CIG de cara á folga, aínda que tamén, é un repaso polas orixes da dita reforma, o seu presente e as súas posibles repercusións.
Inclúe, con este fin, todo tipo de material informativo sobre a normativa, fotografías de diversos actos e novas, amais de seccións como a zona de descargas (onde podemos botar man de análises, avaliacións, convocatorias ou cartaces) e de preguntas frecuentes (onde se trata de resolver as nosas dúbidas respecto á nosa hipotética participación na vindeira convocatoria do día 29, laboralmente falando). Na sección de artigos recentes resúmese o percorrido inmediato da web e dos seus responsables: información sobre a reforma, manifestacións preparadas, seguimento e apoios á folga, posición da mocidade galega, razóns para unha convocatoria como esta, etc.