Ineo organiza a semana vindeira un foro sobre o valor do coñecemento nas empresas do sector

A semana que vén cómpre que teñamos en conta a nosa axenda de actos TIC, sobre todo porque se van desenvolver cuestións de especial importancia para o futuro do noso sector. Esta de asegurar ao máximo as nosas posibilidades de crecemento vindeiro, a tódolos niveis, é a base do Foro Ineo Valoración dos activos intanxibles: patent box e vixilancia tecnolóxica e intelixencia competitiva, un encontro no que se tratarán temas como a identificación do valor da nosa empresa en termos de coñecemento, ou os incentivos fiscais dispoñibles derivados dos nosos activos intanxibles. A xuntanza TIC, que vén da man da asociación Ineo, desenvolverase o vindeiro martes 20 a partir das 10.00 horas no auditorio do Consorcio da Zona Franca de Vigo.
O foro ten o seguinte punto de partida: reivindicar a importancia do coñecemento de cada empresa como un dos seus principais valores. “Hoxe en día”, informa Ineo, “toda empresa TIC pensa nos seus activos como as súas máquinas, edificios, computadores, mesmo nas licencias de software ou código fonte, sen reparar en que a gran maioría do seu activo estriba no propio coñecemento que o seu persoal achegou e achega á propia empresa”. Ante os retos e dificultades que xorden, de xeito inevitable, de gardar, xestionar e recuperar esa información, e tamén do proceso de valorala, xa que vai alén dos custes de adquisición dese coñecemento, cómpre subministrarlles ás nosas empresas métodos e recursos para desenvolver estes procesos do xeito máis doado, eficaz e rendible. Así nolo explica Ineo: “Se sumamos o feito de poder valorar de xeito obxectivo a nosa empresa, co desenvolvemento dunha vixilancia tecnolóxica, enfocada a aplicar nos nosos procesos o concepto de intelixencia competitiva, obteremos unha ferramenta de venda nas nosas entidades e do noso coñecemento como valor engadido”.
O evento será de balde para os socios de Ineo e terá un custe de 40 euros para as restantes empresas e profesionais. Pódese formalizar a inscrición a través da conta administracion@ineo.org ou do número de teléfono 986 112 570. Damos conta agora do programa:
· 10.00 Apertura da xornada a cargo de Jorge Cebreiros
· 10.15 Valoración de Activos Intanxibles: Patent Box, a cargo de Raquel García, directora comercial de EQA Certificados I+D+i.
· 11.00 Vixilancia Tecnolóxica e Intelixencia Competitiva, a cargo de Juan Carlos Pérez, director xeral de Activo I+D+i e economista experto en fiscalidade e innovación.
· 11.45 Rolda de preguntas
· 12.15 Peche da xornada.