Unha amiense supera nunha soa sesión os sete módulos do ECDL

A casualidade fixo que unha veciña de Bertamiráns conseguira superar, nun martes e 13, os sete módulos que compoñen a Certificación Europea de Informática (ECDL), e tamén que esa veciña leve por apelido Brión, o nome do Concello que fixo posible tal fazaña.
Trátase de María Brión Dorca, que bateu o record do Telecentro da vila aprobando tódolos módulos dunha asentada e sen despeitearse.
Dende a web do Concello coruñés bromean coa coincidencia do apelido da examinada co da súa vila e escriben que “sen pretender restar méritos a María e ós seus coñecementos en Informática, o seu primeiro apelido puido actuar como un infalible amuleto, ou cando menos, ser premonitorio”.
“Bromas aparte”, engaden, dende InfoBrion felicitan a María e gaban a súa fazaña.