Windows 8 chegará ao mercado en 3 versións distintas

Microsoft vén de confirmar que Windows 8 chegará ao mercado en 3 versións distintas, adaptándose ás distintas necesidades do público e ao numeroso hardware para o que estará dispoñible, pois nesta ocasión teremos unha plataforma que tanto funcionará en ordenadores tradicionais como en dispositivos tipo tablets, o que supón todo un reto para a compañía de Redmond.
A versión básica chamarase directamente Windows 8, e funcionará en equipos con procesadores baseados en tecnoloxía de Intel (x86) de 32 e 64 bits, que sería o ideal para usuarios domésticos e de pequenas empresas, mentres que para usuarios avanzados ou en contornos corporativos teriamos Windows 8 Pro, que incluirá funcionalidades avanzadas de encriptación, virtualización, administración de equipos e conexión a dominios.
A grande novidade do novo sistema operativo de Microsoft sería o Windows 8 RT, que estaría orientado a equipos con procesadores ARM, e inicialmente só se comercializará preinstalado nos equipos (o que é bastante razoable, posto que non existía un Windows 7 para este tipo de equipos) e incluirá versións optimizadas de varias aplicacións de Office (Word, Excel, PowerPoint e OneNote) para pantallas táctiles. Estariamos ante o Windows 8 para tablets, que non sería totalmente compatible con vellas aplicacións de escritorio, senón só para software deseñado pensando en interfaces táctiles.