Xornada de xogos, obradoiros e relatorios no primeiro día do XGN

Hoxe abriu as súas portas o Xuventude Galicia Net máis solidario de todos os que se levan celebrado ata o de agora (un total de 12), ao estar especialmente orientado a axudarlle á mocidade a atopar traballo, ou a lo menos, a afianzar o contacto con distintas empresas nas que poidan colaborar nun futuro.
Para isto, nesta convocatoria non só priman os xogos, torneos e actividades lúdicas para tódolos públicos (que tamén son necesarias, ninguén o dubida), tamén estamos perante unha edición na que prima a formación e a divulgación de canles e recursos de utilidade para orientar á mocidade na súa andaina profesional.
A axenda deste venres, 4 de maio, sinala a celebración dunha xornada de Activismo Dixital, ás 16:00 horas, na aula 8 do Pazo de Congresos e Exposicións de Galicia, onde, da man de persoal de Médicos sen Fronteiras, de AGARESO, da Cruz Vermella e de Intermón Oxfam, entre outras entidades, daranse a coñecer as claves deste modo de participación social complementario ó voluntariado, que emprega as TIC para solidarizarse coas causas sociais.
Xa ás 17:00 horas terá lugar un relatorio sobre Neuromarketing web, na aula 4; e ás 18:00 horas, para despexar un pouco a mente de tanta información, darán comezo as actividades de maquillaxe e caracterización, da man de expertos maquilladores, e o obradoiro de xogóns, de carácter máis lúdico, porén non menos interesante.
A xente de Krynea ten preparada para as 19:00 horas, unha charla sobre o desenvolvemento de videoxogos en liña, así como unha manchea de actividades a desenvolver ao longo do venres e o sábado, como un obradoiro de fabricación de armas de softcombat, unha batalla de softcombat por alianzas ou un torneo desta modalidade individual, entre outras sorpresas.
Tamén está prevista para as 19:00 horas a intervención de Leopoldo Abadía, que como apuntamos onte, é un profesor e escritor moi coñecido na Rede pola súa análise da crise económica actual, a partir da teoría Ninja.
O obradoiro Como lograr que un blog funcione dará comezo a partir das 20:00 horas, e servirá para mostrar a utilidade desta ferramenta, tanto para xornalistas como para profesionais doutros sectores que pretenden darse a coñecer na Rede. O relator explicará a súa valía a partir dun decálogo deseñado para a ocasión.
A xornada deste venres remata cun ciclo de cine de Zombies, no que se poderán integrar plenamente as persoas que se caracterizaron ao longo da tarde nalgún morto vivente.