Nokia lánzalle un reto expreso aos universitarios a través da súa competición Gamelopers

Cada día, segundo afirman os responsables da firma de telefonía móbil, Nokia, “máis de 1.300 millóns de persoas empregan os terminais desta marca para captar e compartir experiencias, acceder a información, buscar a mellor ruta ou simplemente falar”.
É de entender, xa que logo, que estes máis de 1.300 millóns de usuarios deben de estar contentos coas aplicacións que a firma lles achega, e que deben cubrir amplamente as necesidades que estes lles presentan.
Nisto ten moito que ver a competición para desenvolvedores universitarios que Nokia organiza cada ano, a Gamelopers, que vén de convocar de novo aos máis creativos, cun desafío que se prolongará ata o vindeiro 30 de xuño.
Desta volta, a rapidez no traballo dos desenvolvedores será o motivo do premio.
A diferenza que en Gamelopers, onde a plataformaQt é a protagonista da competición, neste reto as aplicacións deberán ser desenvolvidas nas tecnoloxías Java ou Web App.
Para participar, os interesados deberán inscribirse na web da competición, onde encontrarán toda a información necesaria para comezar cos seus desenvolvementos. Unha vez rematen o seu traballo, deberán escribir un correo electrónico de confirmación a contacto@gamelopers.com, coas ligazóns das súas aplicacións á Tenda Nokia.
A persoa que desenvolva máis aplicacións será premiada cun dispositivo Nokia 808 PureView, o último lanzamento de Nokia que aínda non está dispoñible no mercado e que como características principais conta con cámara de 41 megapixeis, pantalla ULIDE de 4 polgadas, procesador de 1.3 GHz e 512 MB de RAM.
Os estudantes que queden en segundo e terceiro lugar nesta clasificación tamén recibirán divertidos premios polos seus traballos.
A competición Gamelopers, que deu comezo o pasado mes de marzo, está a celebrar xa a súa segunda edición. Os competidores terán ata o 30 de setembro para proceder á suba dos seus videoxogos e aplicacións.
As persoas interesadas en participar atoparán máis información sobre como facelo na páxina oficial do concurso en Facebook.