Retegal disporá dun 60% máis de centros de telecomunicacións

O operador público Retegal contará, ao remate de 2013, cun 60% máis de centros de telecomunicacións. Este espallamento, que foi anunciado e debullado este xoves tralo Consello da Xunta, significa, informou o Goberno galego, que se vai garantir a existencia “de todas as instalacións que se precisan para acadar a cobertura ao 100% de Internet e para que toda a cidadanía teña a dita cobertura nos seus domicilios, nas súas empresas e nos servizos públicos”.
A empresa pública Retegal, informou o presidente da Xunta, foi creada inicialmente para prestar servizos de radiodifusión á CRTVG e a día de hoxe converteuse “nunha peza fundamental no despregamento tecnolóxico de Galicia”, nun operador integral de telecomunicacións que “fixo realidade fitos importantes como o apagamento analóxico”, do mesmo xeito que “está facendo tamén un excelente servizo na expansión da banda larga en toda Galicia”.

O titular da Xunta destacou que co Plan aprobado este xoves (o Consello da Xunta deu luz verde á declaración de incidencia municipal do Plan Sectorial do operador público galego), Retegal seguirá a contar coa rede máis ampla de toda a Comunidade Autónoma tanto a nivel de infraestruturas de transporte como de infraestruturas de difusión. Deste xeito, dixo que arestora dispón de 200 centros de telecomunicación. A maiores, o Consello autoriza construír 116 novos, é dicir, “a incrementalos nun 60%”para cumprir co plan de Despregamento de Internet na Comunidade Autónoma”.
Respecto ao Plan de Banda Larga, o presidente da Xunta aproveitou para facer balance do mesmo, salientando que a día de hoxe, logo da posta en marcha do programa, hai 300.000 usuarios máis das TIC na nosa terra, dispoñendo de acceso a Internet de alta velocidade. Porén, apuntou que aínda quedan cousas por facer, como cubrir o baleiro dos 470.000 galegos e galegas que aínda non teñen o servizo. O obxectivo fundamental, engadiu, é acadar a cobertura do 100% antes de que remate o ano vindeiro.