Microsoft limitará o número de fabricantes que comercialicen tablets con Windows RT este ano

No outono teremos finalmente no mercado o sistema operativo Windows 8, que chegará tamén cunha versión reducida destinada a tablets (Windows RT), pero dende Microsoft parecen querer evitar o que actualmente acontece cos tablets con Android (pois hai numerosos trebellos de baixo custo que achegan unha experiencia de uso lamentable) e van intentar restrinxir os fabricantes que comercialicen trebellos con Windows RT a un grupo reducido, cando menos ata o ano que vén.
Polo que parece, cada fabricante de procesadores para tablets con Windows RT só prové a un par de marcas, de xeito que nVIDIA atendería a ASUS e Lenovo, Texas Instruments a Toshiba, e Qualcomm a Samsung e HP, mentres que o resto de grandes fabricantes de informática de consumo que non figuran na anterior relación centrarían os seus esforzos en desenvolver equipos completos con Windows 8 (deixando a un lado o Windows RT).
Microsoft quere ter certo control nos primeiros tablets con Windows RT (posiblemente para que acheguen todos unha experiencia de uso semellante á demostrada co seu Surface) para chegar ao mercado con certa uniformidade, para abrir a veda en xaneiro de 2013, cando o listón xa estea o suficientemente alto como para que os fabricantes de equipos teñan que manter certo nivel de calidade que permita que a nova plataforma de Microsoft poida competir no mercado actual de tablets, dominado claramente por Apple.