Unha nova aplicación avisa cando rematan as pausas publicitarias en televisión

A pasada fin de semana estreouse na App Store a aplicación para iPhone chamada Duck, el cazador de anuncios, tamén dispoñible para smartphones Android, que resulta moi práctica para as persoas que queiran facer un uso produtivo das pausas publicitarias mentres están a ver a televisión, pois esta ferramenta permite recibir alertas cando rematen os anuncios nas canles que indiquemos (actualmente están dispoñibles Antena 3, Cuatro, Telecinco, La Sexta, La 7, Neox, Nova, La Sexta 3, Nitro, FDF, Divinity e Energy).
Deste xeito poderemos cambiar de canle, ir ao cuarto de baño ou achegarnos á cociña durante a publicidade dos nosos programas favoritos para retomalos cando rematen as pausas promocionais, o que entendemos que non resultará moi agradable para as canles televisivas e anunciantes, pero que claramente agradecerán os espectadores que queren poder erguerse do sofá uns minutos con certa tranquilidade ao saber que o seu móbil avisarao cando rematen os anuncios.
Esta ferramenta precisa de conexión de datos para funcionar (recoméndase Wi-Fi) e é un desenvolvemento de Lorem Solutions que se ofrece de balde con publicidade. Para que este servizo funcione Duck emprega unha tecnoloxía para a identificación da publicidade televisiva desenvolvida en exclusiva para esta aplicación.