µTorrent estrea aplicación oficial para Android

Que os smartphones e tablets con Android non son tan completos como un ordenador é algo que hai que deixar moi claro a quen está a pensar un destes trebellos, pero tal distancia cada vez é máis curta, e agora temos que para axudar a pechar tal fenda dende µTorrent veñen de estrear en probas unha aplicación para descargar contidos a través da rede BitTorrent dende trebellos con Android 2.1 ou superior, sen limitarse a un cliente remoto que facilitaba o control dun ordenador que executase a aplicación completa (como se facía ata o momento).
Con µTorrent Beta podemos descargar contidos de BitTorrent dende un tablet ou móbil, aceptando incluso a subscrición a fluxos RSS de torrents para automatizar a súa achega. Os responsables da aplicación lembran que é recomendable empregala a través de redes Wi-Fi para evitar sorpresas na factura do móbil no caso de contar con tarifas de datos con limitación de tráfico mensual.