MeteoSIX Mobile supera as 20.000 descargas

O interese da poboación galega pola meteoroloxía é evidente, converténdose no principal tema de conversa entre descoñecidos, pero nos dispositivos móbiles tamén goza de moita atención por parte dos usuarios, de aí que a meirande parte dos smartphones integren de serie algunha aplicación ou widget co estado do tempo e a predición meteorolóxica a curto prazo, pero normalmente achegan información de servizos internacionais cunha precisión moi mellorable, de aí que en Galicia contemos con alternativas alimentadas por información máis detallada recollida por Meteogalicia, entre as que destacamos MeteoSIX Mobile, ferramenta que vén de superar as 20.400 descargas.
A aplicación oficial para móbiles de MeteoGalicia pode descargarse de balde para dispositivos con Android ou para terminais móbiles de Apple, facilitando a consulta da información meteorolóxica de máis de 29.500 localidades e 800 praias, podendo tamén consultar a predición meteorolóxica dun punto determinado no mapa, amosando información detallada por hora para os vindeiros 3 días, con datos como a temperatura, o vento, as precipitacións, o estado do ceo, a humidade… facilitándonos a planificación da nosa actividade diaria en función do estado do tempo.
Nos últimos días esta aplicación está a mellorar considerablemente o seu volume de descargas, posiblemente porque incrementouse o grado de coñecemento entre a poboación galega, que tamén emprega cada vez máis móbiles conectados que permiten o uso de aplicacións, e como acontece en todo o Estado, os terminais móbiles que predominan son os baseados no sistema operativo Android, de aí que o 72% das descargas de MeteoSIX Mobile correspondan á súa versión para o S.O. promovido por Google.