A edición dixital de La Voz de Galicia podería provocar infeccións de software malicioso

Durante esta maña varios dos nosos lectores comunicáronnos que tiñan problemas para acceder á edición en liña do xornal La Voz de Galicia, o que tamén están a comentar numerosos usuarios de Twitter, e tras comprobalo no servizo Stop Badware vemos que a páxina principal do diario figura na listaxe negra de páxinas web perigosas por poder provocar infeccións de malware (algo que á sección de anuncios clasificados da publicación pasoulle nun par de ocasión en 2012), por mor dunha a advertencia de Google indicando que lavozdegalcia.es é unha páxina web sospeitosade estar infectada por algún tipo de código malicioso sen coñecemento inicial dos seus responsables, que aseguran (indirectamente) estar a tomar medidas para corrixir a situación.
Mentres o problema non se arranxe non é recomendable acceder a tal páxina web se non temos un equipo debidamente protexido con software de seguridade informática e navegador web actualizado.
ACTUALIZACIÓN (19:00): O servizo de diagnose contra o malware de Google detalla agora que atoparon 3 páxinas de La Voz de Galicia que provocaban a descarga e instalación de software malicioso sen o consentimento do usuario, que correspondía a 1 troiano hospedado en dominios rexistrados en Suíza e Arxentina (e hospedados nos EE.UU.).
ACTUALIZACIÓN (25-1-2013): Stop Badware eliminou esta mañá a páxina web de La Voz de Galicia da súa listaxe negra, polo que podemos considerala libre de malware. Dende La Voz aseguran que aínda que durante a mañá algún navegador web continúa sen poder acceder á súa páxina web, isto é por culpa das cachés que impiden o acceso á versión actualizada da información sobre a seguridade de Lavozdegalicia.es, espazo que xa figura como seguro.