Nokia confirma o inicio da actualización a Windows Phone 7.8 para os seus móbiles Lumia

Hoxe é un grande día para os usuarios de móbiles con Windows Phone, por coincidir un par de boas novas para tal plataforma. Por unha banda temos que Google aceptou a petición de Microsoft de adiar o cesamento do servizo Exchange ActiveSync que empregan os móbiles con Windows Phone para sincronizar o e-mail, os contactos e o calendario dos servizos de Google ata o 31 de xullo (dando tempo a adaptar Windows Phone para adaptarse aos novos protocolos que está a empregar Google para ese tipo de funcións) o que evitará que os usuarios perdan o seu acceso dende o móbil. Por outra banda está a actualización para os vellos móbiles con Windows Phone 7.5 (como os Lumia 510, 610, 710, 800 e 900) que comeza a distribuírse hoxe, o que supón a incorporación de varias das novidades de Windows Phone 8 a terminais que non compren coas súas especificacións mínimas.
O Nokia Lumia 510, ao ser un novo dispositivo, xa está a distribuírse con Windows Phone 7.8, mentres que o resto de smartphones Lumia comezan a recibir a actualización hoxe, aínda que o normal será poder actualizarse a Windows Phone 7.8 durante o mes de febreiro (cando estea dispoñible, os usuarios reciben unha alerta no seu móbil instándoos a conectar o seu móbil a un PC con Zune ou un Mac coa correspondente aplicación de Windows Phone).
Na última actualización de Windows Phone 7.5 incorporábase aos móbiles Lumia novas funcionalidades como a posibilidade de compartir a conexión á Rede (tethering), compartir ficheiros por Bluetooth, gozar de melloras de imaxe con Camera Extras e a dispoñibilidade de aplicacións como a Contact Share, Play To e Nokia City Lens, pero con Windows Phone 7.8 a cousa aínda mellora máis, cun novo menú de inicio a 4 columnas coo posibilidade de elixir entre 3 tamaños de baldosa para cada aplicación ancorada no mesmo, poder personalizar a pantalla de bloqueo (por exemplo, permitindo que Bing modifique a súa imaxe de fondo diariamente) e incrementando o seu soporte de linguas (deixando polo momento fóra ao galego, que continúa presente na súa navegación GPS por voz). Temos así que tras a actualización parece que estamos ante un novo móbil.

Vídeo no que explican a nova actualización dos vellos Lumia